Espainiako R&R-aren historia guztiz bestelakoa izango litzateke abeslari katalan, dotore eta harroputz hau gabe; 32 urteko ibilbidean swing eta poesiarekin ere ausartu den musikaria. Sabino Mendezen abestiak bildu ditu 'La nave de los locos' disko berrian, 80ko hamarkadan arrakasta eman zioten kantuen egilea hain zuzen.

Pentsaezina litzateke 80ko hamarkadako espainierazko rock onena errepasatzea rock and roll izar bihurtzea amets egin zuen El Clot (Bartzelona) auzoko gazte luzangari eta haren tupe harroari erreparatu gabe. Ametsa errealitate bihurtu zen eta hiru hamarkadatan zehar musikari eta konpositore onez inguratu da legenda sortzeko; legenda hori zuzenekoetan gustukoen duen esaldiak laburbiltzen du: “zaila da apala izatea hain handia izanda”. Jose Maria Sanz izena du. Eta goitizena, Loquillo.

 

Los Trogloditas r&r taldearen urrezko aroa ez zen, ostera, artista honen hilobi bihurtu. Are gehiago, bere burua berritu eta betikotu du swing abeslari moduan eta hainbat espainiar olerkariren testuetan; baita solaskide, antzezle eta soinu-banda konpositore moduan ere, beti ere larruzko jaka eta alpakazko trajea baztertu barik.

 

Horrek guztiak are gehiago handitzen du iragan urriaren 23an disko berria argitaratu zuen musikariaren itzala. ''La nave de los locos'' du izenburu Sabino Mendezekiko berradiskidetzea ekarri duen lanak.