Han-hemenkako erakusketez eta 'El fruto de la rama más alta' liburuaren argitalpenaz pintore lana areagotu zuen arren, katalanak ez du bazterrean utzi kantautore-lana. Gaur egun, zeregin horretan dihardu antzoki eta auditorioetan 'Los días intactos' izenburuko 17. grabazioa (bakarkako bosgarrena) aurkezteko antolatu duen biraren barruan, Los Burros eta El Último de la Fila taldeekin hasitako karrera luzeari jarraipena emanez. Ahotsa dugu oraindik flamenko kutsuko lan poetiko honen ezaugarri nagusia.

Ohi bezala, Garcíak musikagile, moldatzaile eta ekoizlearena egin du berriz ere Los Angelesen grabatutako lan honetan, aurrekoan baino “kantu dexente urbanoagoak” bilduz eta orduko “soinu exotikoagoak bilatu eta esperimentatzeko gogoa” bazterrean utziz. Kantariak bere alderik rockeroentzat jo ditu kantu horiek eta kantaldiaren ardatz gisa erabili ditu, kantu zaharrei egindako “errepaso orekatuarekin” batera, marinel giroan apaindutako oholtzaren gainean eta zazpi musikariren laguntzaz.