Euskaraz egindako heavy musikak erreferentzia argia dauka: Su Ta Gar. Eibarko talde aitzindari hau da, seguraski, euskal metalean dagoen itzal luzeenekoa. Askotxo dira, duela 25 urtez geroztik Aitor Gorosabel kantari eta gitarrajolea (jatorrizko taldetik 'bizirik' iritsi den bakarra, Xabi Bastida gitarrajolearekin batera) buru duen talde honi sortu zaizkion imitatzaileak, eta gaurdaino argitaratu dituen bederatzi albumetan argi utzi du inspirazioa generoaren klasikoetan bilatzen duela, nu-metal gisako etiketetatik urrun, eta kritika eta erreibindikazio desberdinei lotutako konpromiso politiko eta sozial garbia duela.
‘Ametsak pilatzen’ dugu Su Ta Garren azken lana, Jo Ta Ke Ekoizpenak izeneko beren disketxeak 2011n editatutako grabazioa. Autogestioaren aldeko apustu garbia dugu industria diskografikoaren egungo gainbeheraren erdian. Beren kontzertuetan (900 inguru! dagoeneko), indarra, melodia metalikoak, gitarra-erakustaldiak eta oinarri erritmiko bizi-biziak uztartu ohi dituzte.