Juan Manuel Díaz de Guereñuk gaztelaniaz zuzendutako solasaldian, Nick Drnaso (Palos Hills, Illinois, 1989) komikigilearen Sabrina (2018) lanari buruz hitz egingo dugu.

Nick Drnaso, Estatu Batuetan jaioa, Chicagon bizi da eta bertan lan egiten du animatzaile eta ilustratzaile gisa. Hiru aldiz proposatu dute Ignatz saria jasotzeko eta Booker Sarirako behin. Besteak beste, aipagarrienak bere bi nobela grafikoak dira: Beverly (2016) eta Sabrina (2018).

Sabrina izan da Literaturako Booker Sarirako proposatu den lehenengo nobela grafikoa (2018), eta oraingoz bakarra. Neska baten desagerpenaren istorioa kontatzen du Drnasok bertan, eta, batez ere, gertaera horren inguruan egungo munduan dauden informazio-gaindosia, konspiranoia eta fake news-ak.