Songwriter aparta ez ezik, Abestien (hizki larriz) zaleek entzuten duten kantautorea dugu Lapido; baita horrelako bat behintzat idatzi nahi duten konpositoreek ere. 091ko kide ohia apurtutako amets gehiago zabaldu du 'Formas de matar el tiempo' albumean, bakarka grabatu duen zazpigarrena.
.091 Espainiako pop rock talderik onenetarikoa izan zen, beriziki Jose Ignacio Lapido gitarristak idatzitako testuen kalitateagatik. Taldeak 1996ko maiatzaren 18n eman zuen azken kontzertua. Gau hartan, ostera, ez zen itzali gaur egun rock kantautore bikain dugunaren magia, disko bakoitzean kalitate maila igotzen jarraitzen baitu, entzule askorengana iristea lortzen ez badu ere. 'Formas de matar el tiempo' album berrian beste behin azaldu du abestia, konplexutasun handiko literatura-lana den heinean, arte adierazpen gorena izan daitekeela.
Habia hutsek, bazterrean utzitako trenek, kolpatutako txakurrek, bidezidorrek eta amildegiek, herdoildutako legeek, kale bakartiek, ehorzleek eta itzal mozorroek betetzen dute itzulerarik gabeko bidez eta alanbre gainean emandako dantza pausoz osatutako ibiltokia. Bertan inor ez dela erabat errugabea gogora dakarkigu Granadako songwriterrak. Tristurarik gabe, dantza egiteko gonbitea ere egiten digu, R&R pixka bat...Itzela, Lapido.
Segur aski asko interesatuko zaizu...