Noizbehinka zintzotasunez eta ausardiaz gainezka egiten duten proposamen musikalekin topo egiten duzu. 'Suite', Marcos Collado (Madril, 1979) gitarristak grabatutako disko ia kontzeptuala, horren adibide garbia dugu. Ander Garcia (baxua) eta Miguel Benito (bateria) musikarien laguntzaz estudioan eta zuzenean grabatutako albuma elkarrengandik urrun bide dauden eraginen arteko zubi musikala da, besteak beste rock progresiboa eta jazz garaikidea.Ia 45 minutuko diskoa da, kontzeptu beraren inguruan bildutako zenbait piezaz osatutakoa. Bidaia musikal txikia, batzuetan elektrikoak, besteetan nagusiki erritmikoak eta beste batzuetan eztiki melodikoak diren pasarteetan zehar. Wayne Krantz (irakasle izan zuen) eta Ben Monder bezalako gitarristak miresten dituen musikari batek gidatutako bidaia.
'Suite' bezalako proposamen baten arriskua aukeratutako formulak sor dezakeen arbuiotik dator hein handi batean. '45 minutuko suitea? Hori gogorregia da niretzat!' Pentsa dezake batek baino gehiagok. Baina albumaren barne koherentziak eta pelikula bateko gidoia bailitzan eman dioten egitura ia zinematografikoak (klimax erritmikoak une ia anbientalekin tartekatzen dira) entzungai egoki bilakatzen dute bai jazzaren zaleentzat eta bai rock klasikoaren jarraitzaileentzat.
Marcos Colladok lan bikaina egin du disko honetan. Zuzenean ikustea ideia ona izan daiteke.