Robben Ford-ena dugu bluesaren munduan izandako karrerarik sendoenetakoa, eta aski ezagunak eta aitortuak dira sei harien gainean frogatu duen trebetasuna eta bluesa, rocka eta jazza fusionatzeko gaitasuna. Bere neurrira egindako Fender modeloa duen kaliforniar honek 13 urte zituela eta saxofoia ikasten ari zela ekin zion 60eko hamarkadan gitarra jotzeari, bere kasa, Michael Bloomfield eta Elvin Bishop-i begira.
1972an, bakarka egindako lehen diskoa kaleratu zuen, 'Discovering the blues', eta 2012an, Michael Landau, Jimmy Haslip eta Gary Novak-ekin batera landutako Renegade Creation proiektuaren bigarren zatia argitaratu du, 'Bullet'. Bata eta bestearen artean, bost aldiz izendatu dute Grammy sarietarako, eta Miles Davis, George Harrison, Joni Mitchell eta Kiss bezalako artista handiekin lan egin du. Bere diskografiak 20 album ditu, horietatik bost The Ford Blues Band, The Ford Brothers eta The Charles Ford Bandekin egindakoak.