Bizitzaren antzertiaz barre egitea eta barre eragitea du helburutzat La Cubanak, 1980an Sitgesen sortutako konpainia historikoak. Haren ateraldi berria, hori egitea jende guztia noizbait protagonista izan den muntaiarik handienarekin: ezkontza bat.
"Antzezlan guztietan erakutsi nahi dugu eguneroko bizitzako gertakizun txiki guztien atzean antzertia dagoela eta ezkontzak antzerti horren zati garrantzitsua dira", azaldu du konpainiaren gaur egungo zuzendari eta sortzaile kide Jordi Millanek. Hori dela eta, 'parodia handiaren parodia" hau sortu dute, Rius sendia protagonista hartuta. Riustarrak hiriko loradenda ezagunaren jabeak dira eta laster alaba Violeta ezkondu behar zaie.
Ospakizuna endredo-segida baten abiapuntua izango da, La Cubanako aktoreek estilo bereziaz kantatzen eta kontatzen dituztenak. Bukaerak, konpainiaren aurreko ikuskizunetan bezalaxe, ezusteko handia gordetzen du.