Guinea Bissau, Cabo Verde eta Portugal. Hori izan da Lisboara 14 urterekin heldu eta halabeharrez zaletasuna ogibide bihurtu zuen afrikar kantariaren ibilbidea. Lagun bati lagundu zion kantu lehiaketa batera, baina nonbait kanta-marmarrean ari zela entzun zioten eta berari entzutea erabaki zuten epaimahaikideek. Konbentzitu egin zituen eta debuta egiteko aukera izan zuen 'Nos raça' (1996) albumarekin. Zorte-kolpe bat lau disko kaleratu dituen gaztearentzat.
Bere musikak sustrai folklorikoa du eta Portugaleko musikaren kutsu lasaia asimilatu du. 'Morna', 'coladera', popa eta Kubako rumba elkarrekin bizi ziren Mindelo hirian ikasten ari zela, bera liluratu zuen arragoa soinudunaren argitasuna ere iradokitzen du bide batez. Bilboko Aste Nagusian abestu ondoren, 'No ama' aurkezten ari da areto txikietan, egokiagoak Teofilo Chantre, Mario Lucio eta Amandio Cabralen piezak biltzen dituen errepertorioaren gozotasunaz eta moldaketen oparotasunaz gozatzeko.