Formatu txikiaren aldeko apustuan, Musiketan-ek "indie rock" etiketa daraman artista frantses honi erreparatu dio. Pierre Emery eta Gil Lesage-ren (Ultra Orange) alaba antzezle eta kantariak elektrizitate eta sentsualtasun printzak zabaltzen ditu 'Under my bed' deritzon estreinako lanean.
Velvet Underground, Rolling Stones eta Stooges bezalako rock eta rock and roll maisuen albumek aparteko lekua zuten bere gurasoen disko-bilduman. Eta horrek eragin handia izan zuen Lou Lesage abeslari eta antzezle frantsesaren nortasunean eta gustuetan. Pierre Emery eta Gil Lesage Ultra Orange rock taldeko kideen alabak baieztatu egin zuen 'zelako zura, halako ezpala' esaeraren egiazkotasuna eta laster, 18 urte besterik ez zituela, musikan bere lekua bereganatzearen aldeko apustua egin zuen.
2011. urtean bete zuen helburua, 'Under my bed' argitaratu zuenean, Parisen eta Nashvillen grabatutako album sosegatua. Lan horrek aukera eman dio xumetasun, sentsualitate eta feminitate konbinazio iradokitzailea azaltzeko. Gertukoek ere Cat Power eta Alisson Mosshart aipatu dituzte haren eragin nagusitzat eta Lou Pariseko eszenaren benetako musa da.
Segur aski asko interesatuko zaizu...