Antzerkiak, zuzeneko musikak, pinturak eta literaturak bat egiten dute 'Hura ez da lekua' lanean, Metrokoadroka kolektiboaren laugarren ikuskizuna. Hainbat disziplinaren arteko elkar topaketa, atez ate saltzaile dabilen pertsonaiaren gogoeta islatzeko. Eta horren ondorioa: zoriontasuna dela mendeku posible bakarra.
"Eszenan arte desberdinek bat egin dezakete eta guretzat modu bikaina da oso jende desberdinak elkarrekin bat egiteko", dio Oian Guilan idazleak, Asier Sarasolarekin batera testuen egile eta zuzeneko ahotsen esataria denak. Emaitza hainbat arte-adierazpen uztartzen dituen ariketa eszenikoa da, non bakoitzak balio erantsia ematen dion osotasunari. Lanaren osagarri den disko-liburua ere aurkeztuko dute Durangoko Euskal Liburu eta Disko Azokan.
'Hura ez da lekua' ezohiko alea da euskal antzerkigintzan, ikuskizun eszenikoen mugak esploratu eta zabaldu nahi dituen ahalegin eszeniko zintzoa.