36 urtez jardunean izan eta gero, Calamarok errepertorio izugarria dauka. Popa eta rocka sustrai folklorikoarekin nahastu ditu; eta herri-musikako ezinbesteko artista bati, ia legendarioa dena, dagokion aura eskuratu du merezimendu osoz. Sorterri Argentinan emandako lehen urratsak kontuan hartu gabe, bai bakarka eta bai Los Abuelos de la Nada taldearekin, Ariel Rotekin batera Los Rodriguez gogoangarrien buru izan zenean jakin genuen bere talentuaren berri. Bere kantu-bilduma finkatzen hasi da orain bakarlari gisa izenpetzen ari den bigarren aroan; 'Honestidad brutal' gisako maisu-lanak izan dira horren erakusgarri garbia, odola eta malkoak darizkion disko apurtzailea.

Soilik kantu klasikoekin kontzertu luzea eskaintzeko lain izango luke, baina hautaketa egokia egin beharko du 'Bohemio' 16. albumeko abestiei lekua egiteko. Slide lerroz apaindutako kantu pausatuak bildu ditu lan berri honetan. Bertan egunerokoari kantatzen dio, zatika hautsitako bihotzei, eta barkamena eskatzen du soilik maiteminduek egin dezaketen bezala. Ezinbesteko bira.