Gernikako boskotea halako soiltasuna, backgrounda, gustu ona eta irekitasuna azaltzen ditu, benetako diamantea bilakatu dela musika-eszena hanpatuan. Taldeak dituen 15 urteetan zehar findutako diamantea; tarte nahikoa rocketik abiatuz, musika beltzaren gordintasuna eta mehartasuna bereganatzeko.
Audience-ren handitasuna agerian geratu da 'Big affaire'-n, moldaketetan oparoa den albuma, New Jerseyn grabatutakoa eta John Agnellok ekoitzitakoa, intentsitatea darioa eta sentimendu sakonak 'musikatzeko' bidea ematen duena. Grabazioan mugaldeko soinuak azaleratzen dira, glam ukitu txundigarriz hornitutako boogie eta rockarekin batera. Kabaret ukiturik ere sumatzen da, ia ilunabarrekoa; antzinako bluesa lehertzen da eta post folka aipatzen duenik ere izango da. Taldeak aspaldian erakutsi zuen hurbilago dituela Idahoko artzainak, bere Urdaibaiko surflariak baino. Euskal eszenako 'rara avis'. Baita penintsuakoa ere. Sekulako gozamena.