Holako gauzen kontuak eramaten dituztenen arabera, Bilbao Bbk Live honetako erakargarri nagusiak 85 milioi disko saldu ditu. Taldeko kideak 'celebrity'-ak dira, musikalak ere inspiratu dituzten rockaren zirkuko izarrak. Hala ere, askok gogoan izango dute Laudioko gaztetxean eskaini zuten emanaldia. Adibidez. Izan ere, hirukote kaliforniarra ez da egun bateko lorea, lehendabizi Lookout zigiluaren babespean underground eszenan aritutako taldea baizik. Gero, ordurako Reprise etxearekin, zerua ukitu zuen 1994an argitaratutako 'Dookie' albumeko hit bildumarekin.

Geroztik, Billie Joe Armstrong eta lagunak punk rock melodikoaren sinonimoak dira, nerabeei zuzendutako gitarra-kolpe eta melodia-sorta. Green Dayren lorpen nagusia entzule berriak bereganatu eta halako errespetagarritasun kutsuari eustea izan da, rock operatan ('American idiot') eta 'Uno', 'Dos', eta 'Tré' album berriek osatutako trilogian erabili dituzten testu garratz eta mamitsuei esker.