Artista askok direnak eta ez direnak egingo lituzkete erraz ezagutzeko moduko soinua lortzearren, beren proposamena identifikatzen laguntzeaz gain, aurkezpen-txartel gisa erabil dezaketen zigilu bereizgarria sortzearren. Ez da hau Joël Iriarteren kasua. Kantautore katalanak, murrizkerietatik ihes eginez, hetereogeneotasuna eta aldaketa ditu xede. Horixe da bere benetako ezaugarria, bere bereizgarria, ausadia, eklektizismoa eta kalitatea uztartzen dituena.

Horren froga dugu 'El caldero' izenburuko bere bosgarren diskoaren edukia, pop doinuak istorio xelebre samarren gainean antolatzen dituena ('Enséñame a amar' Russian Red-en laguntzaz egindako klip baten gainean osatu du), patxangari keinu eginez eta katalanez egindako kantu bat tarteko... Aurreko lanetan, folklorea, erritmo latinoak, elektronika eta beste batzuk jorratu zituen. Joe Crepúsculok ez du etenik egin, seinaleztatu gabeko bideetan barna murgil daiteke inor axolagabe utzi gabe. Ezin du gehiago eskatu artista batek.