Erakusketa Azkuna Zentroak eta Bartzelonako Museu d'Art Contemporani-k (MACBA) sortu dute elkarlanean, Vicent Todoliren zuzendaritzapean. Artistaren artxibo pertsonaletik abiatuta, garai hartan egin zituen instalaziorik nabarmenenak birsortu dituzte. Aukera aparta da Antoni Miraldaren sortze-mekanismoak bertatik bertara ikustea ahalbidetzen duen material-sorta zabalaz gozatzeko. Horien artean daude ikus-entzunezkoak, zirriborroak, argazkiak eta bestelako agiri ugari, gehienak inoiz erakutsi gabeak.
Erakusgai egongo diren lanen artean, honako hauek nabarmen litezke: ‘Breadline’ (1977) 1929ko Depresio Handian janaria eskuratzeko sortzen ziren ilara luzeak irudikatzen dituena; ‘El Internacional Tapas Bar & Restaurant’, Montse Guillen sukaldariarekin batera New Yorkeko TriBeCa auzoan bultzatutako esperimentu sozial eta artistikoa; eta ‘Santa Comida’, kultura afro-karibetarrak gaur egungo Estatu Batuetan utzitako ondarea biltzen duena; azken hau Bilboko Artelan Berreginen Museoan ikus daiteke.