Coque Mallak etengabe abestu die emakumeei. Hala egiten zuen 80ko hamarkadan ezagun egin zuen Los Ronaldoseko burua zela. Eta hala jarraitu du gaur egun arte, betiereko nerabearen Peter Pan itxura eta ahots berezia ezaugarritzat izan dituen bakarkako ibilbidean zehar, pop rock estiloan berezko proposamena finkatzeko bidea eman dion ibilbidea.
Beraz, ez da harritzekoa 'Mujeres' bezalako proiektu bat aurkeztea. Bertan bere kantuetako 11 ('She understands' berriarekin eta 'El rey'-ren moldaketa batekin batera) moldatu ditu, tonu sosegatuan, sentsibilitatea eta dotorezia bilatuz, besteak beste vals kadentzietara hurbilduz. Emakumezko hamar kantari eta antzezlerekin batera egn du hori: Leonor Watling, Anni B Sweet, Jeanette, Angela Molina, Rebeca Jimenez, Laura Gómez Palma... Ezinezkoa litzatekeenez haiekin guztiekin bira bat antolatzea, kantariak deialdia egin zuen eta abeslari 'ezezagunei' emango die aukera. Beste arrazoi bat kontzertu honetara joateko.